Украина президенті Владимир Зеленский 1 желтоқсанда Парижге барып, Франция президенті Эммануэль Макронмен кездесті. Ал АҚШ президентінің арнайы уәкілі Стив Уиткофф Мәскеуге келді. Бұл Украинада төрт жыл жалғасып жатқан соғысты аяқтау үшін жүріп жатқан келіссөз үшін тағы бір маңызды апта болмақ.
Зеленский Парижге "әділ әрі мығым бейбітшілікті талқылау үшін" келгенін мәлімдеді. Ал жексенбі, 30 қарашада Флоридада АҚШ пен Украина делегациялары келіссөз жүргізіп, екі тарап та "мәнді кездесу болғанын" айтқан. Бірақ келіссөздің жай-жапсарын толық ашпады.
Зеленский мен Макрон Париждегі кездесуден соң АҚШ президенті Дональд Трамптың арнайы уәкілі Стив Уиткоффпен сөйлесті. Уиткофф ертең, 2 желтоқсанда Ресей президенті Владимир Путинмен кездеседі. Бұл Уиткофф пен Путиннің жыл басынан бергі алтыншы кездесуі болмақ.
"Бұл өте маңызды сөйлесу болды және біз басқа да детальдарды кездесіп талқылауға келістік" деді Зеленский әлеуметтік желіде.
БЕЙБІТШІЛІК ҮШІН "МАҢЫЗДЫ АПТА"
"Ресейдің кейбір талаптарын орындап соғысты аяқтаудың мәні жоқ. Керісінше бұл Ресейді түрлі бағыттағы экспансиясын жалғастыруға итермелейді" деді Украина президентінің кеңесшісі Михаил Подоляк 1 желтоқсанда "Настоящее время" телеарнасына.
Подоляк "күн тәртібінде Трамптың бейбіт жоспарының компромисс варианты болады" деп санайды.
Ал Еуропа одағының сыртқы саясат бойынша жоғарғы өкілі Кая Каллас 1 желтоқсанда "бұл бейбіт келіссөзде маңызды апта болуы мүмкін" деді.
АҚШ президентінің әкімшілігі ұсынған 28 пункттен тұратын жоспар Украина тарабын және Зеленскийді қатты ашуландырған. Бұл жоспарда Украина Донбассты Ресейге беретіні, НАТО-ға мүше болудан бас тартатыны, Украина әскерін 850 мыңнан 600 мыңға қысқартатыны айтылған.
Кейін, 23 қарашада Киев өкілдері АҚШ мемлекеттік хатшысы Марко Рубиомен Женевада келіссөз жүргізіп, 28 пункт 19 пунктке қысқарғаны айтылды. Араға бір апта салып, Киев пен Вашингтон делегациясы Флоридада тағы кездесті.
РЕСЕЙ УКРАИНАДАҒЫ ШУДАН "ПАЙДА КӨРІП ЖАТЫР"
Соғысты тоқтату бойынша келіссөз қызған тұста Украинада жемқорлық дауы да ұшықты. Ал келісімдерде Украина делегациясын басқарып жүрген Андрей Ермак 28 қарашада қызметтен кетті. Зеленский кеңсесінің басшысы болған Ермактың қызметтен кетер күні үйі тінтілген еді.
Ермактың кеңесшісі болған Подоляк Украинадағы жемқорлық дауынан Ресей пайда көріп жатыр деп санайды.
"Олар Украинадағы ішкі қақтығыстарды барынша шулату үшін отқа май құйып отырады. Олар мұны қалай жасау керегін біледі, қолдарында көптеген ақпараттық платформалар, әлеуметтік желілер бар. Қазір енді олар ішкі қақтығысқа назар аударып, бақылап отыр" деді Подоляк "Настоящее время" арнасына.
Ал Трамп 30 қарашада жемқорлық шуы бейбіт келіссөз процестеріне "кері әсер ететінін" ескертіп, "Украинаның ішінде бірнеше ұсақ мәселелер бар" деді.
Бейбітшілік келіссөздері қызып жатса да, Ресейдің Украина қалаларына шабуылы толастар емес. 1 желтоқсанда Днепр қаласына жасалған ракета шабуылынан төрт адам қаза тауып, 40 адам жараланғаны хабарланды.
Ал Кремльдің баспасөз хатшысы Дмитрий Песков Украинаның суда жүзетін дрондарының Каспий құбыр консорциумына жасаған шабуылына шағымданды.
Ол жексенбідегі шабуылды "шектен шыққандық" деп атап, бұл құбырмен америкалық ірі Chevron компаниясы да мұнай тасымалдайтынын, құбырдың "халықаралық маңызы барын" айтты.
Ал осы құбырмен мұнай тасымалдайтын Қазақстан Киевке ресми түрде қарсылық білдірді. Киев қарсылыққа жауап ретінде "Украинаның бірде-бір әрекеті Қазақстан я басқа үшінші тарапқа қарсы бағытталмағанын атап өтеміз. Украинаның барлық күш-жігері БҰҰ Жарғысының 51-бабында көрсетілген өзін-өзі қорғау құқығын жүзеге асыру аясында Ресейдің басқыншылығын тойтаруға бағытталған" деп мәлімдеген.
