"Қазақстан журналистер одағы" Orda.kz сайтының бас редакторы Гүлнәр Бажкенованың ұсталуына байланысты мәлімдеме жасап, құқық қорғау органдарын "кінәсіздік презумпциясын сақтауға", істі "объективті және бейтарап" тексеруге шақырды.
Одақ өз мәлімдемесінде қылмыстық кодекстен 274-бапты ("Көрінеу жалған ақпарат тарату) алып тастап, бұл бапты "азаматтық-құқықтық қатынастар санатына" ауыстыруды ұсынды.
"Жалған не жала жабу сипатындағы ақпарат таралды деген тұлғалар немесе ұйымдар өз беделін тек азаматтық-құқықтық қатынастар аясында ғана қорғауы тиіс. Аталған бап журналистер мен белсенділерді қылмыстық жауапкершілікке тартудың әмбебап тетігіне айналды" деді одақ Telegram-дағы мәлімдемесінде.
"Қазақстан журналистер одағы" – журналистерден тұратын шығармашылық бірлестік.
1 желтоқсан күні Orda.kz редакциясының Алматы мен Астанадағы кеңсесінде тінту жүргені, сайттың бас редакторы 2 айға үйқамаққа алынғаны, редакцияның өзге қызметкерлерінен жауап алынғаны мәлім болды. Тінту кезінде құзырлы органдар Алматыдағы кеңседен құрылғыларды алып кеткен. Редакция адвокаттары тінту кезінде процессуалдық нормалар бұзылғанын, құзырлы орган өкілдері тінту туралы қаулыны көрсетпегенін айтты.
Редакцияға тінту басталған сәтте Алматы қалалық полиция департаменті "келіп түскен өтініштер негізінде О. ақпараттық ресурсының редакторы азаматша Б.-ға қатысты қасақана және бірнеше рет жалған мәліметтер тарату деректері бойынша қылмыстық істер қозғалғанын" хабарлады.
"Алдын ала мәліметтер бойынша, 2024 жылы жарияланған материалдардың бірінде құқық қорғау органы қызметкерінің пара алған кезде ұсталды деген шындыққа жанаспайтын ақпарат таратылған. Тергеу барысында мұндай фактінің болмағаны нақтыланды. Осылайша, азаматша Б.-ның әрекеттері жарияланымда көрсетілген қызметкердің кәсіби беделіне нұқсан келтіріп, қоғамда жалған пікір қалыптастырған" деген Алматы полициясы.
"Әділ сөз" сөз бостандығын қорғау ұйымы Orda.kz сайты мен бас редакторы Бажкенованың жағдайына алаңдаушылық білдіріп, мәлімдеме жасады. Ұйым "тараптардың процессуальдық құқығы мен қылмыстық-процессуальдық кодекстің сақталуы керегіне назар аударады".
"Тергеу процедураларының толық ашық жасауға, журналистердің құқығын құрметтеуге және сөз бостандығына қысым деп бағаланатын кез келген әрекеттерге бармауға шақырамыз" деді "Әділ сөз" мәлімдемесінде.
- 2025 жылы шілдеде Orda.kz басылымының негізін қалаушы әрі бас редакторы Гүлнәр Бажкенова иелігіндегі медианы билікпен байланысы бар адамдар рейдерлік жолмен тартып алғалы жатқанын мәлімдеген. Бұған дейін де түрлі қысым жасалып келді деген журналист сайтты алып қалу үшін Қазақстанның да, АҚШ-тың да сотына арызданып жатқанын айтқан.
- Қыркүйектің басында Orda.kz басылымы өз дереккөзіне сүйеніп, Қазақстанның сыртқы істер министрі Мұрат Нұртілеу мен кәсіпкер Гаджи Гаджиев және ҰҚК-нің бірқатар қызметкері ұсталды деп хабарлаған. Кейін Нұртілеу ел алдына шыққан соң Бажкенова өз сөзіне "дәлел барын", бірақ "жеңілгенін" айтып жазба қалдырған. Дегенмен қозғалған қылмыстық істердің бұл оқиғаға қатысы бар-жоғы туралы ештеңе айтылған жоқ.