Биыл қараша айында Украинаның қарулы күштері Ресейдің мұнай өңдеу зауыттарына кемінде 14 рет дронмен шабуыл жасаған – бұл соғыс басталғалы бір айда жасалған ең көп шабуыл. Мұндай ақпаратты Bloomberg агентігі соғысып жатқан тараптардың жария мәлімдемелеріне сүйеніп жазды.
Өткен айда ресейлік мұнай құятын инфрақұрылымдар мен Ресей мұнайын таситын танкерлер де шабуылға ұшыраған. Мысалы, өткен аптаның аяғында, Bloomberg дереккөзінің сөзінше, Украина Қара теңізде екі танкерге шабуыл жасаған. Бұған қоса, бұған дейін Ресей мұнайын тасып жүрген тағы бір танкер Сенегал астанасы маңында жағалауда болған жарылыс салдарынан зақымданған.
28 қараша кешке Украинаның қауіпсіздік қызметі (СБУ) Түркияның Қожалы өңіріндегі жағалауда Ресейдің "тасадағы флотына" тиесілі Kairos және Virat кемелеріне теңіз дрондары шабуыл жасағанын хабарлады. Еуропа одағы, Ұлыбритания, Швейцария және АҚШ санкция салған ол екі кеме Новороссийскіні бетке алып жүзіп бара жатқан. 29 қарашаға қараған түні Новороссийскіде Қазақстан мұнайының 80 пайыздан астамын экспортқа шығаратын Каспий құбыр желісі консорциумының (КҚК) теңіз терминалын да экипажсыз катерлер шабуылы зақым келтірді.
Шабуыл салдарынан теңіз танкерлеріне мұнай құйылатын үш айлақ құрылғысының бірі істен шықты. Қазақстанның энергетика министрлігі мұнайды халықаралық нарыққа балама жолдармен жіберу жағын қарастырып жатқанын мәлімдеді.
Кремль КҚК мен танкерлерге жасалған украин шабуылын "халықаралық маңызы бар әрі халықаралық қатысушылары бар нысанға" қарсы "шектен шыққан" оқиға деп атады.
Bloomberg Ресей әскері Украинаның энергетика инфрақұрылымына және тұрғын үйлерді қоса алғанда, бейбіт нысандарына үнемі шабуыл жасап келе жатқанын да жазған.