Қырғызстанның денсаулық сақтау министрі Еркін Чечейбаев қызметінен босатылып, оның орнына министр міндетін атқарушы болып Ұлттық қауіпсіздік жөніндегі мемлекеттік комитеттің (ҰҚМК) Жалал-Абат облысы бойынша басқармасының бұрынғы басшысы Каныбек Досмамбетов тағайындалды. Мұндай хабарды президент әкімшілігінің ақпараттық саясат бөлімінің басшысы Дайырбек Орунбеков Facebook-тегі парақшасына жариялады.
"Бүгінде денсаулық сақтау жүйесіне де терең реформа, елеулі өзгерістер қажет. Сол себепті министр лауазымына бұған дейін өзін реформатор және тиімді менеджер ретінде көрсеткен Каныбек Досмамбетов таңдалды. Кейбір сыншылар арасында: "Ол дәрігер емес қой, денсаулық сақтау министрі бола ала ма?" деген пікір тууы мүмкін. Алайда оның орынбасарлары болып саланы жақсы білетін, денсаулық сақтау жүйесінде көп жыл еңбек еткен мамандар істемек. Ал Досмамбетов басшы ретінде денсаулық сақтау саласында көп жыл бойы қалыптасқан сыбайлас жемқорлық схемаларын жоюға және тәртіп орнатуға басымдық береді", – деп жазды Дайырбек Орунбеков.
Енді Досмамбетовтің кандидатурасы парламенттің мақұлдауына ұсынылуға тиіс. Оған дейін ол "министр міндетін атқарушы" мәртебесінде жұмыс істейді. Өткен демалыс күні сайланған Жогорку Кеңештің жаңа құрамы жұмысына, болжам бойынша, желтоқсанның екінші жартысында кіріседі.
Еркін Чечейбаев биылғы ақпан айынан бері Денсаулық сақтау министрлігін басқарып келді. Оған дейін ол Қырғызстанның бас санитарлық дәрігері және денсаулық сақтау министрінің орынбасары қызметтерін атқарған. Сондай-ақ Дүниежүзілік денсаулық сақтау ұйымында да жұмыс істеген.
Каныбек Досмамбетов бұған дейін ҰҚМК-нің Жемқорлықпен күрес қызметі басшысының орынбасары болған.