Ресейде адамның иммун тапшылығы вирусын (ВИЧ) жұқтырып өмір сүріп жатқан жандар саны бір жылда шамамен 35 мыңға өсіп, 1,25 миллион адамға жеткен. 15-50 жас аралығындағы ресейліктер арасында халықтың 1 пайызы, яғни әр жүзінші адам ВИЧ жұқтырған. Мұндай ақпаратты жұқтырылған иммун тапшылығы синдромы (СПИД) дертінің алдын алу және оған қарсы күрес жөніндегі Федералдық ғылыми-әдістемелік орталықтың жетекшісі, Ресей ғылым академиясының академигі Вадим Покровский айтты деп хабарлайды Азаттықтың Орыс қызметі.
Оның сөзінше, Ресейдегі ең көп зардап шеккен топ – 40-45 жастағы ер адамдар, олардың 4 пайызы ВИЧ-ке шалдыққан. Дәл сол жастағы әйелдер арасында бұл көрсеткіш 3 пайызға жетеқабыл.
Покровскийдің мәлімдеуінше, әлем бойынша ВИЧ жұқтырған 40 миллион адам анықталған. Жыл аяғына дейін тағы 1,4 миллион адам тіркеледі деген болжам айтылып отыр.
Былтыр Ресейдің 14 өңірінде жүкті әйелдер арасында ВИЧ жұқтырғандардың үлесі 1 пайыздан асқан, ал сол өңірлердің 11-інде бұл көрсеткіш бірнеше жыл қатарынан 1 пайыздан жоғары деңгейде қалып отыр деп жазды "Если быть точным" жобасы. Әсіресе вирусты жаңадан жұқтырғандар көрсеткіші Чукот автономды округінде, Иркутск және Самара облыстарында жоғары дейді мамандар.
Жоба сонымен қатар ВИЧ салдарынан болатын өлім-жітім туралы ашық деректер жоқ екенін атап айтады. Зерттеушілердің сөзінше, жылда ВИЧ-пен өмір сүретін жандардың шамамен 30 мыңы қайтыс болады, олардың 18 мыңы тікелей вирус салдарынан көз жұмады.