Қазақстандық Vласть басылымы жаппай DDoS-шабуыл салдарынан интернет сайтының жұмысы нашарлағанын хабарлады.
"Сайтқа бірнеше күн бойы шабуылға ұшырады, солардың ең ауқымдысы бүгін жасалды. Басылым провайдерінің техникалық мамандары DDoS-шабуылды тойтару жұмысын жүргізіп жатыр", – деп жазды Vласть Telegram-арнасында 2 желтоқсанда.
Сейсенбі күні Астана уақытымен сағат 16.30 шамасында Қазақстандық кейбір қолданушылар басылым сайты кідіріңкіреп ашылатынын байқағанын айтса, енді біреулері сайт қалыпты жұмыс істеп тұрғанын жазды.
DDoS (distributed denial of service) – "қызмет көрсетудің тоқтауы." Мұндай кибершабуыл кезінде онлайн-ресурсқа көп жақтан мақсатты түрде трафик жіберіледі, оған күші жетпеген онлайн-ресурс жұмыс істемей қалады.
Қазақстанда интернет-басылымдар мен өзге де ресурстарға кибершабуыл жасау бұған дейін де бірнеше мәрте тіркелген. Былтыр осындай шабуылға ұшыраған ақпарат құралдары құқық қорғау органдарына арыз түсірген. Ұжымдық арызға Kursiv.Media, Inbusiness.kz, ProTenge, Shishkin_like, AIRAN және "Обожаю" жобасының журналистері қол қойған. Бас редакторлар мен журналистер арызды цифрлық даму және ақпарат министрлігі мен халықаралық құқық қорғау ұйымдарына да жіберетінін мәлімдеген. Әдетте ондай шабуылдардың артында кім тұрғаны ашылмаған күйі қалады.
