"Құқықтық медиа орталық" Orda.kz пен Бажкеноваға жасалған тінтуді "журналистерге психологиялық қысым" дейді

Қазақстандағы журналистердің құқығын қорғайтын "Құқықтық медиа орталық" Orda.kz сайтының редакциясы мен бас редакторы Гүлнар Бажкенованың үйін тінтігендегі "өрескел процессуальдық қателіктерге назар аударуға шақырды". Орталық "редакцияның әрекеті қоғамға қауіп төндірмегенін" атап өтті.

"Біз мұны медиа қызметкерлеріне психологиялық қысым, Қазақстан медиа кеңістігіне өзін-өзі цензуралау және үрей атмосферасын төндіру деп бағалаймыз. Журналистерге кәсіби міндетін сөз бостандығы және ақпаратқа қол жеткізу құқығын пайдалана отырып, кедергісіз орындауға мүмкіндігі болуы керек" деді "Құқықтық медиа орталық" 2 желтоқсандағы мәлімдемесінде.

1 желтоқсанда полиция Orda.kz сайтының Алматыдағы редакциясы мен бас редакторы Гүлнәр Бажкенованың үйінде тінту жүргізген еді. Редакцияға сайттың заңгері мен адвокаты кіре алмаған. Кешкісін Бажкенованың "көпе-көрнеу жалған ақпарат тарату" күдігімен екі айға үйқамаққа алынды.

Алматы қаласының полиция департаменті "Алдын ала мәліметтер бойынша, 2024 жылы жарияланған материалдардың бірінде құқық қорғау органы қызметкерінің пара алған кезде ұсталды деген шындыққа жанаспайтын ақпарат таратылған. Тергеу барысында мұндай фактінің болмағаны нақтыланды. Осылайша, азаматша Б.-ның әрекеттері жарияланымда көрсетілген қызметкердің кәсіби беделіне нұқсан келтіріп, қоғамда жалған пікір қалыптастырған" деген еді.

"Құқықтық медиа орталық" мемлекеттік органдардың әрекеті қаншалықты демократиялық принциптерге, конституциялық нормаларға сай келетінін тексеруге, ашық, әділ әрі заңды тергеу жүргізуге шақырды.

Бұған дейін "Әділ сөз" баспасөз бостандығын қорғау ұйымы мен Қазақстан журналистер одағы да Бажкенованың жағдайына алаңдаушылық білдіріп, мәлімдеме жасаған.

"Әділ сөз" "тараптардың процессуальдық құқығы мен қылмыстық-процессуальдық кодекстің сақталуы керегіне назар аударады", ал Қазақстан журналистер одағы да істі "объективті тексеруге" шақырған.