Алматы облысындағы жолда болған апаттан жеті адам мерт болған. Облыстық полиция департаменті баспасөз қызметінің 2 желтоқсандағы дерегінше, Алматы – Бішкек тас жолының 129-шақырымында Honda Odissei жеңіл көлігі алдында кетіп бара жатқан, тіркемесі бар Howo жүк көлігімен соқтығысқан.
Апат салдарынан жеңіл көліктегі адамдардың бәрі – алты жолаушы мен жүргізуші түгел қаза тапқан деді полиция. Бірнеше кісінің ажалына себеп болған апатқа байланысты сотқа дейінгі тергеу амалдары жүргізіліп жатыр.
Осы көлік апатынан қаза тапқандар арасында есту қабілетінен айырылған спортшылар мен спорт ардагерлері бары кейінірек мәлім болды. Ол туралы Ұлттық сурдлимпия комитетінің вице-президенті және жол қозғалысы қауіпсіздігі ассоциациясының президенті Арсен Шакуов Facebook-парақшасында мәлімдеді.
Қазақстанда адам қазасына себеп болған жол апаттарының саны азаймай отыр. 24 қараша күні Алматы мен Шығыс Қазақстан облыстарында жол апатынан жиынтығы тоғыз адам опат болды. 17 қарашада Батыс Қазақстан облысында жолдағы көлік апатынан сегіз адам қазаға ұшыраған. 4 қараша күні Шығыс Қазақстан облысы аумағындағы жолда көлік апаты салдарынан бес кісі қаза тауып, бір адам зардап шекті. 23 қазан күні Ақтөбе өңірінде Самара-Шымкент бағытындағы жолда жүк көлігі мен "Газель" автомобилі соқтығысқан. Апат салдарынан 12 адам мерт болды, арасында кәмелетке толмаған екі бала бар. 3 қазанда Абай облысында Омбы-Майқапшағай тас жолында болған жол апатынан 4 адам көз жұмды.
Ішкі істер министрлігінің дерегі бойынша, Қазақстанда жыл сайын орта есеппен 2500 адам жол апатынан қаза табады. Елде 1991 жылдан бері жол-көлік апатынан опат болған адам саны бірде 4 мыңға өсіп, бірде 2 мыңға дейін кеміп отырған. Кейінгі төрт жылдағы есепке сәйкес, адам шығыны баяу өсіп келеді.
2022 жылы – 2425 адам;
2023 жылы – 2543 адам;
2024 жылы– 2579 адам қаза болған.
ОҚИ ОТЫРЫҢЫЗ Жол апаты неге көбейді? Жылдамдықты асыру мен жауапсыздық салдары