1 желтоқсанда Қазақстанның Нидерландыдағы елшілігінің алдында бірнеше адам тіркелмеген “Атажұрт” партиясының мүшелерінің ұсталуына қарсылық білдіріп, оларды қудаламауды талап етті. Митингтен видео белсенділердің бірі Қымбат Әбеудің Facebook парақшасында жарияланды. Қарсылық білдіргендердің арасында ол да бар.
Видеода бірнеше адамның Нидерланды елшілігінің алдында “атажұрттықтардың” суретін ұстап тұрғаны көрінеді. Бұдан кейін олар елшіліктен шыққан қызметкерге талап хат тапсырады. Хатта Алматы облысында ұсталған “атажұрттықтардың” аты-жөні жазылған.
“Олар Алматы облысының айдаласында бейбіт түрде наразылық өткізіп, Қытайда жазықсыз ұсталған Қазақстан азаматы Әлімнұр Тұрғанбайды босатуды, Қытайдағы этникалық қазақтарға жасалып жатқан қысымды тоқтатуды, сонымен бірге Қытай-Қазақстан арасындағы теңсіз визасыз режимді тоқтатуды талап еткен. Аталған азаматтардың әрекетінде қылмыс құрамы жоқ” деп жазылған белсенділер таратқан талап хатта.
Видеода елшілік өкілінің талап хатты алып, оны азаматтық арыз ретінде тіркейтінін айтады. Бірақ “саяси үндеулерге жауап беруге тиісті еміспіз” деп ескертіп, ішке кіріп кетеді.
Қарашада Алматы облысында Қытайда ұсталған Әлімнұр Тұрғанбайды босатуды талап еткен 18 адамның әкімшілік жауапқа тартылғаны белгілі болған еді. Кейін оларға "алауыздық қоздыру" бойынша айып тағылатыны хабарланған еді.
Полиция құжатында олардың "Қытай туы мен басшысының суретін өртегені", осылайша "174-баптың 2-тармағында көрсетілген әрекет істегені" көрсетілген.
Ал бес адамның құқығын қорғап жатқан адвокат Шынқуат Байжанов қамауға алынғандардың іс-әрекетінде қылмыс құрамы жоқ деп мәлімдеген. "174-бапта "ту өртеу – қылмыс" деген түсінік жоқ", – деп түсіндірді ол.
Акция барысында тіркелмеген "Атажұрт" белсенділері Қытайға жұмыс істеуге кетіп, сол елде ұшты-күйлі жоғалған Қазақстан азаматы Әлімнұр Тұрғанбайды елге қайтаруды Қытайдан талап еткен. Туыстары Қытай полициясы ұстаған Әлімнұр Тұрғанбайға араша сұрап, бірнеше мәрте Астанаға арыз-өтініш жолдаған.
Қазақстанның сыртқы істер министрлігі Қытай берген ақпаратқа сүйеніп берген жауабында, 48 жастағы Әлімнұр Тұрғанбай Қытай азаматтығынан шықпағаны, ал қос азаматтық екі елде де "заңсыз" екені айтылған.