Кремльде Америка өкілдері Стив Уиткофф пен Джаред Кушнердің Ресей басшысы Владимир Путинмен кездесуі кеше түнде аяқталды. Ол шамамен 5 сағатқа созылды.
Путиннің арнайы уәкілі Кирилл Дмитриев X желісінде “өнімді” өткенін жазды.
Кездесу кезінде Ресейдің Украинаға қарсы соғысын аяқтау бойынша жаңа жоспар талқыланды. Путиннің көмекшісі Юрий Ушаков “Украина бойынша әзірге ымыраға келу жоспары жоқ, Американың кейбір ұсыныстары Ресейге қолайлы, кейбірі қолайлы емес” және “АҚШ бейбітшілік жоспарының нақты тұжырымдамасы талқыланбады” деп мәлімдеді. Оның сөзінше, “жер мәселесі де” сөз болған.
Америка өкілдерімен кездесуден бұрын, ВТБ инвестициялық форумының пленарлық отырысында сөз сөйлеген Путин Киевтің Қара теңіздегі танкерлерге шабуылына жауап ретінде «Украинаны теңізден ажыратамыз» және "украин порттары мен кемелеріне шабуылды үдетеміз" деп сес көрсетті.
Форумда Путин сонымен бірге майдандағы ахуалға да тоқталды. Атап айтқанда, Донецк облысындағы Покровск Ресей әскерінің толық бақылауында деп мәлімдеді. Ал Украина қарулы күштерінің бас штабы мұны жоққа шығарды.
Путин бұған қоса, Еуропаны сынап, Украинадағы соғыс туралы көзқарасына шүйлікті. Ресей басшысы Еуропа елдерін Трамптың ұсынысына "Ресей үшін мүлде ақылға қонымсыз" өзгерістер ұсынуға талпынды, осылайша "бейбітшілік процесін тежеуге тырысты" деп айыптады.
28 пунктен құралған Америка ұсынған жоспар әуел баста "Ресейдің ұсыныстарына" негізделіп әзірленгені және Украина жерін беруді қарастыратыны хабарланған.
Ресей жоспарды қабылдағанмен оны Киев, Брюссель және Вашингтонда сынаған. Одан кейін құжат біраз өзгертілді. Жаңа нұсқасын Путин Уиткофф және Кушнермен бірге талқылауы тиіс болған.