1 желтоқсанда Парижде Франция президенті Эммануэль Макрон Украина президенті Владимир Зеленскиймен кездесті. Олар сондай-ақ Еуропадағы одақтас мемлекеттер басшыларымен телефонмен сөйлесіп, АҚШ-тың Ресейдің Украинаға қарсы соғысын тоқтату жөніндегі бастамаларын талқылады.
Телефон әңгімесіне Германия канцлері Фридрих Мерц, Ұлыбритания премьер-министрі Кир Стармер, АҚШ президентінің арнайы өкілі Стив Уиткофф пен Украина тарапынан бейбіт келіссөздерге жауапты делегация жетекшісі Рүстем Умеров қатысқан. Зеленскийдің сөзінше, әңгіме барысында украин делегациясының өткен аптада Флоридада АҚШ өкілдерімен өткізген келіссөздерінің мазмұны талқыланған.
Макронмен бірлескен баспасөз мәслихатында Зеленский Киев үшін бейбіт келіссөздердегі басты басымдық – мемлекет егемендігін сақтау және берік қауіпсіздік кепілдіктерін қамтамасыз ету екенін айтты. Оның сөзінше, жер мәселесі ең күрделі тақырып болып отыр: осы мәселе америкалық делегациямен келіссөздер барысында алты сағаттан астам уақыт талқыланған.
– Ертең біздің делегация Ирландияға ұшып келген соң, келіссөздердегі жағдайдың егжей-тегжейін маған толық баяндайды, – деді Зеленский. Бұған қоса ол АҚШ ұсынған бейбіт жоспар осы келіссөздер нәтижесінде "анағұрлым тиімді көрінетінін" де атап айтты.
Зеленский Стив Уиткофф Ресейге барғаннан кейін өзі АҚШ президенті Дональд Трамппен келіссөз өткізем деп үміттенетінін білдірді (Уиткофф Ресей президенті Владимир Путинмен 2 желтоқсанда кездеседі деп жоспарланған).
Франция президенті Макрон Париждегі баспасөз мәслихатында Ресеймен бейбіт келіссөздер барысында Украина өз территориясына қатысты кез келген шешімді тек өзі қабылдауға тиіс екенін ерекше атап айтты. Толығырақ төмендегі материалдан оқыңыз:
ОҚИ ОТЫРЫҢЫЗ Келіссөздегі "маңызды апта". Зеленский – Парижде, Уиткофф – Мәскеуде