"Отбасы банк" 2025 жылдың 4 желтоқсанынан бастап enpf-otbasy.kz платформасы арқылы зейнетақы ақшасын көзді емдеуге жұмсау туралы өтініш қабылдауды тоқтатқанын хабарлады. Бұған дейін қабылданған өтініштер қаралады.
"Өтінім қабылдауды тоқтату – денсаулық сақтау министрлігінің БЖЗҚ емдеу үшін пайдалану ережелеріне енгізген өзгерістерімен байланысты. 3 желтоқсанда тиісті бұйрық жарияланды. Жаңа ережелерге сәйкес, зейнетақы қаражатын стоматологияға да, офтальмологияға да пайдалануға рұқсат берілмейді" деп жазылған "Отбасы банктің" хабарламасында.
Банктің айтуынша, қазіргі кезде "офтальмология" бағыты бойынша жалпы құны 13,3 млрд теңге болатын 15 808 өтініш келіп түскен: 5 мыңнан астам өтініш бойынша құжаттарды банк қызметкерлері тексеріп жатыр, 10,6 мыңнан астам өтінішке қатысты қосымша құжаттар сұралып жатыр.
Банк өкілдерінің айтуынша, тіс емдеу қызметі бойынша өтініш қабылдау тоқтатылғаннан кейін көзді емдету бойынша өтініштер күрт ұлғайған. Егер 15 қыркүйекке дейін айына шамамен 174 өтініш келген болса, ізінше бұл көрсеткіш 7 есе артып яғни, 1264-ке жеткен.
Банк өкілдері бір мезетте "күмәнді жайттарды" да байқағанын атап өтеді.
"Атап айтқанда, әртүрлі клиенттер бір офтальмологиялық клиникамен келісімшарт жасаса да, құжаттарда клиника әр қалада орналасқан түрлі мекенжайлармен көрсетілген. Тексеру барысында бұл мекенжайларда мұндай клиниканың жоқ екені белгілі болды" деп жазылған банктің хабарламасында.
"Отбасы банктің" айтуынша, десе де азаматтар зейнетақы ақшасын қазір төмендегідей мақсат үшін пайдалана алады:
• орфандық (сирек) ауруларды емдеу;
• реконструктивтік және қалпына келтіру операциялары;
• радионуклидті және радио-йод терапия;
• радиохирургиялық ем;
• протондық терапия.
Бұған дейін денсаулық сақтау министрлігі 2025 жылдың 15 қыркүйегі мен 2026 жылдың 15 сәуір аралығында зейнетақы ақшасын тіс емдеуге пайдалану туралы өтініш қабылдау доғарылатынын мәлімдеген. Бұған зейнетақы жинағын мақсатсыз пайдалану жағдайлары көбейгені себеп болғаны айтылған. Қаржы мониторинг агенттігінің дерегінше, стоматологиялық қызметке деп БЖЗҚ-дан негізсіз 200 млрд теңге алынған.