Еуропа кеңесі мен Еуропарламент өкілдері 2027 жылы Ресейдің табиғи газын импорттауды толық тоқтату туралы алдын ала келісімге қол жеткізді.
Еурокеңестің мәлімдемесіне қарағанда, Ресейдің табиғи газын импорттау 2027 жылы 30 қыркүйекке қарай толық тоқтатылады. Алдын ала келісімсіз газ сатып алу операциялары 2026 жылы маусымда тоқтатылады. Ұзақ мерзімдік келісім бойынша сұйылтылған газды тасымалдау 2027 жылдың 1 қаңтарында аяқталуы керек. Құбыр бойынша газ тасымалдау 2027 жылы 30 қыркүйекте тоқтатылады.
"Еуропа ендігәрі энергетикалық бопсалау мен экономикалық тәуелділіктің құрбаны болмайды" деп мәлімдеді энергетика жөнінде еурокомиссар Дэн Йоргенсен.
Ресей 2022 жылдың көктемінде Еуропаға газ жеткізуді күрт тоқтату арқылы Украинаны қолдаған Еуропаға әсер етпек болған кезде одақ осы кіріптарлықтан шығудың жолдарын іздей бастаған.
Еуроодақ елдерінің басым бөлігі Ресей газынан бас тартты. Биыл қазан айының соңындағы мәлімет бойынша, Ресей газы Еуроодақ импорттайтын газдың шамамен 12 пайызын құрады. Ресей Украинаға басып кіргенге дейін бұл көрсеткіш 45 пайыз болды. Қазір тек үш ел – Франция, Венгрия және Бельгия Ресей газын импорттап жатыр.