Еуропа кеңесінің президенті Антониу Кошта Астанаға ресми сапармен келді. Ол Ақордада Қазақстан президенті Қасым-Жомарт Тоқаевпен келіссөз жүргізді. Келіссөзде екі жақты қарым-қатынасты нығайту, гуманитарлық ынтымақтастық, виза режимін жеңілдету, көлік-логистика, цифрландыру, энергетика, маңызды минералдар, ауыл шаруашылығы сияқты мәселелер талқыланған. Бұл жөнінде Ақорда хабарлады.
– Соңғы 10 жылда Еуропа одағы Қазақстанның ең ірі сауда серіктесіне және шетелдік инвесторына айналды. Қазақстан Еуропаға мұнай мен уран жеткізуші елдердің үштігіне кіретін ел ретінде экономикалық қауіпсіздігімізді қамтамасыз етуде негізгі рөл атқарады. Бүгін біз қарым-қатынасымызды нығайтудың және экономикалық байланыстарды дамытудың жаңа кезеңіне қадам басамыз, – деді Еуропа кеңесі президенті.
Кездесуде Қазақстан президенті Қасым-Жомарт Тоқаев Қазақстан – Еуроодақпен Кеңейтілген серіктестік және ынтымақтастық туралы келісімге қол қойған өңірдегі тұңғыш ел екенін айтты.
– Біз өзара құрмет пен түсіністікке негізделген берік әрі мазмұнды серіктестікті қолдаймыз. Өзара саяси диалогымыз ортақ мүддемізге сәйкес келетін көп бағыт бойынша қарқынды дамып келеді, – деді Тоқаев.
Еуроодақтың ұстанымы бойынша, ЕО-Қазақстан стратегиялық әріптестігі аймақтың энегетикасын әртараптандыру, қалпына келетін инвестицияны арттыру, технологиялық даму және ЕО үшін өте маңызды шикізатты жеткізу тұрғысынан маңызды.
Былтыр Қазақстан мен Еуроодақ арасындағы тауар айналымы 50 миллиард долларға жеткен, ал 2005 жылдан бері Қазақстанға Еуроодақ елдері салған инвестицияның жалпы көлемі 200 миллиард долларға жуықтаған. Еуропа одағының Орталық Азиямен сауда-саттығының 80 пайызы Қазақстанға тиесілі.
Екі жақ Орталық Азия мен Еуроодақ арасындағы С5+1 форматындағы диалогтың нәтижесін жоғары бағалады. Мұндай саммит алғаш рет биыл 3-4 сәуірде Өзбекстанның Самарқан қаласында өткен. Онда Еуроодақ аймақтың инфрақұрылым саласына 10 миллиард еуро көлемінде инвестиция салынатынын айтқан.
27 елден тұратын блок "Ғалам қақпасы" (Global Gateway) инфрақұрылым жобасы аясында аймаққа инвестицияны көптеп салуға келіскен. Кей сарапшы мұны Қытайдың "Бір белдеу – бір жол" жобасына бәсекелес деп санайды.
Ресей Украинаға соғыс ашып, Мәскеуге санкциялар салынғалы бері ЕО аймақтың транзит әлеуетіне, минералдарына ерекше қызығушылық білдіріп келеді.
